Ներկայացվել են «կանաչ շենքերի» նոր ձեռնարկներ ՝ խթանելու էներգաարդյունավետ շինարարությունը

Նոյեմբերի 25-ին ՄԱԿ-ի Զարգացման ծրագրի (ՄԱԶԾ) հայաստանյան գրասենյակը՝ Համաշխարհային բանկի (ՀԲ) հայաստանյան գրասենյակի և ՀՀ քաղաքաշինության կոմիտեի հետ համատեղ, ներկայացրեցին նոր խորհրդատվական նյութերի համապարփակ փաթեթ, որի նպատակն է ամրապնդել Հայաստանի անցումը դեպի «կանաչ», կլիմային դիմակայուն և էներգաարդյունավետ շինարարություն։

Միջոցառման մասնակիցներին, որոնց թվում էին պետական մարմիննմերի, զարգացման գործընկերների, մասնագիտական միությունների, ակադեմիական շրջանակների և մասնավոր հատվածի ներկայացուցիչներ, ողջունեցին Հայաստանում ՄԱԶԾ մշտական ներկայացուցիչ Նաթիա Նացվլիշվիլին, ՀԲ Հայաստանի գրասենյակի ղեկավար Ֆաբրիցիո Ձարկոնեն, և ՀՀ քաղաքաշինության կոմիտեի նախագահի տեղակալ Դավիթ Գրիգորյանը։

Պաշտոնապես ներկայացվեցին հետևյալ հրատարակությունները՝

• «Կանաչ շենքերի» ուղեցույց,
• Շենքերի ջերմամեկուսացման տեխնիկական լուծումների ձեռնարկ, և
• Ջերմամեկուսիչ նյութերի տվյալների շտեմարան։

Այս հրատարակությունները գործնական, փաստահեն ուղեցույցներ են ճարտարապետների, ինժեներների, շինարարների, համայնքների և բնակիչների  համար։ Դրանք նպատակ ունեն նպաստել էներգաարդյունավետ նախագծմանը, բարելավել շենքերի ջերմամեկուսացման գործառույթները և աջակցել բնապահպանական առումով պատասխանատու շինարարական մոտեցումների ներդրմանը ողջ Հայաստանում։

Հայաստանում ՄԱԶԾ մշտական ներկայացուցիչ Նաթիա Նացվլիշվիլին ընդգծեց «կանաչ» զարգացման ազգային կարողությունների ամրապնդման կարևորությունը․ «Հայաստանի կլիմային դիմակայունության և կայուն զարգացման հավակնությունները պահանջում են գործիքներ, որոնք կամրջում են քաղաքականությունն ու դրա իրականացումը։ Այս ուղեցույցները կաջակցեն պետական մարմիններին, մասնագետներին և համայնքներին՝ որդեգրելու ավելի «կանաչ», անվտանգ և արդյունավետ շինարարական գործառույթներ»։

ՀԲ Հայաստանի գրասենյակի ղեկավար Ֆաբրիցիո Ձարկոնեն ընդգծեց շինարարական ոլորտի ազդեցությունը ծայրահեղ եղանակային պայմանների հետևանքների մեղմման և դրանց հարմարվողականության վրա։ «Մոլորակը ապագա սերունդների համար կենսունակ պահելու տեսանկյունից շատ կարևոր են ջերմոցային գազերի արտանետումների ազդեցության և հետևանքների նվազեցմանն ուղղված համակարգված գործողությունները։ Հայաստանում ավելի կայուն և կանաչ շինարարության անցումն ամրապնդելու համար, սույն ուղեցույցները նպատակ ունեն տրամադրել գիտելիք և համապատասխան պատկերացումներ ոլորտի մասնագետներին՝ ապահովելու առավել դիմացկուն, արդյունավետ և կայուն կառուցապատ միջավայր։

Նյութերը նպաստում են Հայաստանի՝ Փարիզի համաձայնագրի, Ցածր արտանետումների երկարաժամկետ զարգացման ռազմավարության և երկրի դիմակայուն ու ներառական աճի առավել լայն նպատակների իրականացմանը։

Նոր հրատարակված ձեռնարկները կծառայեն որպես երկարաժամկետ ռեսուրսներ պետական մարմինների, նախագծողների, կառուցապատողների և ակադեմիական շրջանակների համար՝ նպաստելով Հայաստանում առավել դիմակայուն կառուցապատված միջավայրի ձևավորմանը։

Միջոցառումը համատեղ կազմակերպվել էր ՄԱԶԾ-ԿԿՀ «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» և Աղետների նվազեցման և վերականգնման գլոբալ կառույցի ֆինանսական աջակցությամբ իրականացվող ՀԲ-ի Քաղաքային և աղետների ռիսկերի կառավարման տեխնիկական օգնության ծրագրերի շրջանակում։