Տեղի է ունեցել «Կլիմայի փոփոխություն և էներգիայի անցումային մոտեցումներ. գործելու հնարավորություններ խորհրդարանականների համար» համաժողովը

Նոյեմբերի 1-ին Մատենադարանում տեղի է ունեցել «Կլիմայի փոփոխություն և էներգիայի անցումային մոտեցումներ. գործելու հնարավորություններ խորհրդարանականների համար» համաժողովը: Միջոցառումը կազմակերպվել էր ՄԱԶԾ «Խթանելով Հայաստանի Հանրապետության Ազգային ժողովի արձագանքման կարողությունները, արդյունավետությունը, թափանցիկությունն ու ներառականությունը» և «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրերի շրջանակներում՝ Ազգային ժողովի հետ սերտ համագործակցությամբ։

Համաժողովին մասնակցել են ՀՀ ԱԺ պատգամավորներ, Կառավարության անդամներ, դիվանագիտական կորպուսի ու միջազգային կազմակերպությունների ներկայացուցիչներ, ՀՀ ԱԺ աշխատակազմի փորձագետներ, քաղաքացիական հասարակության կազմակերպությունների ներկայացուցիչներ:

Ողջույնի խոսքով հանդես են եկել ՀՀ Ազգային ժողովի նախագահի տեղակալ Հակոբ Արշակյանը, Հայաստանում Շվեդիայի դեսպան Պատրիկ Սվենսոնը, և Հայաստանում ՄԱԶԾ մշտական ներկայացուցիչ Նաթիա Նացվլիշվիլին։

«Հայաստանում մենք զգացել ենք կլիմայի փոփոխության հետեւանքները՝ սկսած գյուղատնտեսության կառուցվածքի փոփոխություններից մինչեւ ջրամատակարարման և ջրահեռացման հետ կապված խնդիրներ: Որպես խորհրդարանականներ՝ մենք կարևոր դեր և պատասխանատվություն ենք ստանձնել այս հարցում: Մեր գործը ոչ միայն օրենքներ մշակելն է, այլև օրինակ ծառայելը, կրթելը և այնպիսի քաղաքականություն վարելը, որի առաջնահերթությունը կայունությունն ու դիմակայունության բարձրացումն է» -ողջույնի խոսքում նշել է ԱԺ նախագահի տեղակալ Հակոբ Արշակյանը։

Հայաստանում Շվեդիայի դեսպան Պատրիկ Սվենսոնը հաստատել է քաղաքականություն մշակողների, փորձագետների և գործընկերների միավորման կարևորությունը՝ լուծելու այնպիսի կարևոր խնդիրներ, ինչպիսիք են կլիմայի փոփոխությունը և էներգետիկ անցումը: Նա նաև կարևորել է Շվեդիայի երկարամյա գործընկերությունը Հայաստանի հետ, ներառյալ համագործակցությունը կառավարման բարեփոխումների, խորհրդարանական զարգացման և բնապահպանական կայունության ոլորտներում։

«Մենք պետք է միասին գործենք՝ ռիսկերը մեղմելու, կլիմայական դիմակայունությունն ամրապնդելու և կայուն էներգետիկ լուծումների առաջխաղացումը արագացնելու համար։ ՄԱԿ-ի Զարգացման ծրագիրը (ՄԱԶԾ) հպարտությամբ կանգնել է Հայաստանի կառավարության կողքին այս ճանապարհին։ Հաջորդ տարի մենք նշելու ենք Հայաստանում ՄԱԶԾ-ի գործունեության 30-ամյակը՝ վերահաստատելով մեր հանձնառությունը՝ աջակցելու Հայաստանին հաղթահարելու այսօրվա մարտահրավերները՝ միաժամանակ պլանավորելով կայուն և ներառական ապագան» - ասել է Հայաստանում ՄԱԶԾ մշտական ներկայացուցիչ Նաթիա Նացվլիշվիլին։

Քննարկումների ընթացքում բանախոսները տարբեր ձևաչափերով անդրադարձել են կլիմայի օրակարգի ամրապնդման գործում խորհրդարանի դերին, էներգիայի այլընտրանքային աղբյուրներին անցնելու անհրաժեշտությանը, դիտարկվել են Հայաստանում կլիմայի ռիսկերի փաստական ապացույցները, ընդգծվել են դիմակայունության ամրապնդման կարևորությունը:

ՄԱԶԾ «Խթանելով Հայաստանի Հանրապետության Ազգային ժողովի արձագանքման կարողությունները, արդյունավետությունը, թափանցիկությունն ու ներառականությունը» ծրագիրը ֆինանսավորվում է Նորվեգիայի արտաքին գործերի նախարարության, Շվեդիայի կառավարության և ՀՀ Ազգային ժողովի կողմից։

ՄԱԶԾ «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագիրը ֆինանսավորվում է Կանաչ կլիմայի հիմնադրամի կողմից և իրականացվում ՄԱԶԾ-ի կողմից՝ ՀՀ շրջակա միջավայրի նախարարության համակարգմամբ: