Երևանի 15 մանկապարտեզ վերակառուցվել կամ հիմնանորոգվել է էներգաարդյունավետության ծրագրի շրջանակում

Երևանի էներգաարդյունավետության ծրագրի առաջին փուլի շրջանակում Երևանի քաղաքապետարանի նախաձեռնությամբ՝ ՀՀ կառավարության, Եվրոպական ներդրումային բանկի (EIB) և E5P հիմնադրամի հետ համագործակցությամբ, վերակառուցվել կամ հիմնանորոգվել է 15 մանկապարտեզ։

Ծրագրի իրականացման գործում կարևոր դեր է ունեցել ՄԱԿ-ի զարգացման ծրագիրը (ՄԱԶԾ)՝ Կլիմայի կանաչ հիմնադրամի (ԿԿՀ) դրամաշնորհային համաֆինանսավորմամբ տրամադրելով տեխնիկական աջակցություն։ Դրա շրջանակում իրականացվել են շենքերի էներգետիկ աուդիտներ, մշակվել են էներգաարդյունավետության լուծումներ, իրականացվել է տեխնիկական վերահսկողություն և ներդրվել են ժամանակակից կանաչ չափորոշիչներ՝ նպաստելով էներգիայի խնայողությանը և շրջակա միջավայրի վրա բացասական ազդեցության նվազեցմանը։

Ծրագրի արդյունքներից է Երևանի Քանաքեռ-Զեյթուն վարչական շրջանի հ. 156 մսուր-մանկապարտեզը։ Հիմնանորոգումից հետո այն երեխաների համար ապահովել է ավելի անվտանգ, հարմարավետ և էներգաարդյունավետ միջավայր։ Նախակրթական հաստատությունն ունի 6 խումբ, որտեղ հաճախում է 180 երեխա։ Մանկապարտեզը համալրվել է անհրաժեշտ ժամանակակից գույքով և տեխնիկայով։

ՄԱԶԾ-ի և ԿԿՀ-ի տեխնիկական աջակցության ու փորձագիտական ուղղորդման շնորհիվ էներգաարդյունավետության բարելավման և արդիականացման աշխատանքներ են իրականացվել նաև 43 այլ հանրային շենքերում, այդ թվում՝ առողջապահական և մշակութային հաստատություններում։ Այս աշխատանքները նպաստում են հանրային ենթակառուցվածքների էներգասպառման և CO₂ արտանետումների նվազեցմանը։

Ծրագրի հիմնական արդյունքները.

15 մանկապարտեզ՝ վերակառուցված կամ հիմնանորոգված։
43 այլ հանրային շենք՝ արդիականացված և էներգաարդյունավետության բարելավման աշխատանքներով ընդգրկված։
Տեխնիկական աջակցություն՝ էներգետիկ աուդիտների, էներգաարդյունավետ լուծումների նախագծման և տեխնիկական վերահսկողության միջոցով։

Ծրագիրը կարևոր քայլ է Երևանի հանրային ենթակառուցվածքների արդիականացման, էներգախնայողության խթանման և ավելի անվտանգ ու հարմարավետ միջավայրի ձևավորման ուղղությամբ։