Տվյալահեն կլիմայական գործողությունների խթանում. ՄԱԶԾ-ն ներկայացրել է Հայաստանի շենքերի ոլորտի համար մշակված MRV նոր ուղեցույցները

Հունիսի 15-ին ՄԱԶԾ-ԿԿՀ «Շենքերի էներգաարդյունավետ արդիականացմանն ուղղված ներդրումների ռիսկերի նվազեցում» ծրագրի շրջանակում պաշտոնապես ներկայացվեցին Հայաստանի շենքերի ոլորտի համար մշակված Չափողականության, հաշվետվողականության և հավաստագրման (Measurement, Reporting and Verification–MRV) նոր ուղեցույցները։

MRV համակարգը կարևոր գործիք է կլիմայական գործողությունների առաջընթացի գնահատման, ջերմոցային գազերի արտանետումների մոնիտորինգի և ազգային մակարդակով հաշվետվողականության ապահովման համար։ Համակարգի ներդրումը նպաստում է տվյալների հավաքագրման և վերլուծության միասնական մոտեցումների ձևավորմանը՝ ստեղծելով ամուր հիմք երկրում կլիմայի փոփոխությանն առնչվող արդյունավետ և փաստահեն քաղաքականությունների մշակման համար։

Միջոցառման ընթացքում ՀՀ Շրջակա միջավայրի նախարարության Կլիմայական քաղաքականության վարչության պետի պարտականությունները կատարող Աննա Մազլումյանը կարևորեց MRV համակարգի դերը Հայաստանի միջազգային կլիմայական պարտավորությունների կատարման վրա հիմնված քաղաքականությունների մշակման գործում։ Անդրադառնալով Կլիմայի մասին օրենքի կարևորությանը՝ նա ընդգծեց, որ նախարարությունը զգալի ներդրում է ունեցել շենքերի ոլորտում MRV համակարգի զարգացման և ներդրման գործընթացում՝ ապահովելով շարունակական ինստիտուցիոնալ աջակցություն և ուղղորդում։

ՄԱԶԾ-ԿԿՀ ծրագրի միջազգային ղեկավար Ռուսուդան Տուշուրին նշեց, որ MRV համակարգըն առանցքային նշանակություն ունի էներգաարդյունավետության ոլորտում իրականացվող միջոցառումների երկարաժամկետ կայունության համար։

«Էներգաարդյունավետության միջոցառումների ազդեցությունը ճշգրիտ գնահատելու և ազդեցության տվյալներ հավաքագրելու համար՝ ոչ միայն այս ծրագրի, այլև պետական, մասնավոր և միջազգային այլ նախաձեռնությունների շրջանակում, չափազանց կարևոր է միասնական մեթոդաբանության կիրառումը», -  նշեց նա։

Նոր ուղեցույցները մշակվել են միջազգային և ազգային փորձագետների համատեղ աշխատանքի արդյունքում՝ համաշխարհային լավագույն փորձը հարմարեցնելով Հայաստանի առանձնահատկություններին և կարիքներին։

Աշխատաժողովի ընթացքում միջազգային փորձագետ Աննա Սիխարուլիձեն ներկայացրեց ուղեցույցները և դրանց գործնական կիրառմանն առնչվող միջազգային փորձը։ Ազգային փորձագետ Տիգրան Սեկոյանը ներկայացրեց տվյալների հավաքագրման և ջերմոցային գազերի արտանետումների մոնիտորինգի մեթոդաբանությունը, որը նախատեսված է տարբեր կատեգորիաների շենքերում մեղմման քաղաքականությունների և միջոցառումների առաջընթացին հետևելու համար։

Աշխատաժողովը դարձավ կարևոր հարթակ ոլորտի մասնագետների, պետական կառույցների և գործընկեր կազմակերպությունների միջև փորձի փոխանակման և մասնագիտական քննարկումների համար՝ նպաստելով Հայաստանում կլիմայական գործողությունների մոնիտորինգի և հաշվետվողականության համակարգերի հետագա զարգացմանը։