Շարունակվում է էներգասպառող սարքերի էներգաարդյունավետության նկատմամբ պարտադիր պահանջների ընդունման գործընթացը՝ ըստ «Էներգախնայողության և վերականգնվող էներգետիկայի մասին» ՀՀ օրենքում փոփոխություն և լրացում կատարելու մասին» օրինագծի: Այդ մշակվել է ՀՀ տարածքային կառավարման և ենթակառուցվածքների նախարարության կողմից՝ ՄԱԶԾ-ՌՏՀ տարածաշրջանային ծրագրի աջակցությամբ: Օրինագիծը քննարկվեց Ազգային ժողովի տնտեսական հարցերի մշտական հանձնաժողովի կողմից, որը 2020թ. մարտի 18-ին տվեց դրա վերաբերյալ դրական եզրակացություն:

Ըստ փաստաթղթի հիմնավորման՝ էներգաարդյունավետության պարտադիր պահանջների սահմանումն ուղղված է պետական միջոցների արդյունավետ կառավարման բարձրացմանը, պետության կողմից էներգախնայողության և էներգաարդյունավետության խթանմանը, ինչպես նաև էլեկտրական էներգիայի` անընդհատ աճող պահանջարկի բավարարման համար անհրաժեշտ՝ էներգահամակարգի պահանջվող դրվածքային հզորության կրճատմանը:

Օրինագծի ընդունմամբ ակնկալվում է.

- պետության կողմից սեփական օրինակով էներգաարդյունավետ տեխնոլոգիաների տարածման խրախուսում ու սպառողներին դեպի էներգաարդյունավետ ապրանքատեսակների ձեռք բերման ուղղորդում,

- պետական կարիքների համար ձեռքբերվող ապրանքատեսակների էներգաարդյունավետության պահանջների սահմանում,

- պետական գնումների շրջանակներում ձեռքբերվող սարքերի նկատմամբ պետական միջոցների տնտեսում երկարաժամկետ հատվածում,

- ԵԱՏՄ համապատասխան տեխնիկական կանոնակարգի (TR EAEU 048/2019) ներդրման հետ կապված մարտահրավերներին դիմակայելու պատրաստականություն,

- ՀՀ-ԵՄ համապարփակ եւ ընդլայնված գործընկերության համաձայնագրով ստանձնած պարտավորությունների մի մասի՝ կարգավորումների ներդաշնակեցման վերաբերյալ դիրքորոշման հստակեցում: